Páginas del blog Ría de Ribadeo

viernes, 9 de noviembre de 2018

Un cisne na Ría de Ribadeo, catro grous... e outras aves menos raras.


Achégase o inverno, volve o mal tempo, e con el comezan a chegar as aves invernantes á Ría de Ribadeo. Así que o sábado pola mañá saín dar unha volta para ver como estaba a cousa.

Porto deportivo de Ribadeo



E a cousa estaba de rarezas, como veredes a continuación. A primeira delas era a presenza dun cisne bravo, que leva varios días por aquí.




Pero si cabe, aínda máis chamativa foi a nova de que había catro grous na ría. Entereime mentres estaba en Salías con Pablo Miki, que recibiu un whatsapp de Carlos Sanjurjo avisando de que acababa de velos na enseada do Tarrón. Pablo saíu rápido para aló, mentres eu me quedaba un cacho máis na Lieira. Como sabedes, vexo grous a cotío no inverno, debido ás miñas numerosas saídas pola meseta castelá, así que pese á rareza da observación, decidín non darme presa por velas.

Axiña Pablo as localizou e tiroulles unhas fotos, que me pasou para poder colgar no blog. Eu achegeime un rato máis tarde, pero a marea subira un pouco, e xa non estaban alí. Ainda que foron observadas en máis ocasións durante esta semana, así que estiveron varios días pola zona.





E despois de dar conta destas dúas rarezas locais, imos coas aves propiamente invernantes, as que se poden ver cada ano na nosa ría. Na Lieira podía verse xa un grande número de anátidas, básicamente lavancos e patos asubiadores . Tamén cullereiros (40), garzotas, garzas reais, corvos mariños, biluricos pativerdes, píllaras reais, pilros comúns, mazaricos reais e chiadores, e un picapeixe.

Cullereiros

Garzota

Píllara real

Picapeixe



Desde a punta de Castropol o máis destacado era un mergullón pequeno, raro de ver nesta zona da ría.

Mergullón pequeno

Bilurico bailón


No Muro de Lamas, coa marea xa moi alta, xuntábanse coma sempre os grandes bandos de anátidas e as limícolas. Así, os lavancos, patos rabudos, asubiadores, cercetas e frisados, mesturábanse con mazaricos reais, chiadores e rabinegros, biluricos pativerdes, patirrubios, píllaras cincentas (3) e pilros comúns.




Píllaras cincentas


Anátidas

Patos rabudos

Patos asubiadores





E desde o observatorio de Reme, a clásica observación dunha águia peixeira no seu pousadoiro (Virgilia, presumiblemente). Xa hai tres na ría, as dúas habituais, Virgilia e Panchita, e outra que segundo Carlos Sanjurjo debe ser a mesma do ano pasado.







Así que xa vedes, temos a ría moi animada nestas datas. E aínda faltan aves por chegar, así que merece a pena aproveitar e gozar coa gran riqueza de aves deste estupendo espazo natural que temos ó pé da casa.

Para rematar, déixovos a lista completa de aves observadas:

Castellano / Nombre científico / Galego
Cisne cantor / Cygnus cygnus / Cisne bravo
Ánade silbón / Anas penelope / Asubiador - pato asubión
Ánade friso / Anas strepera / Pato frisado
Cerceta / Anas crecca / Cerceta
Ánade real / Anas platyrhynchos / Lavanco
Ánade rabudo / Anas acuta / Pato rabilongo
Zampullín común / Tachybaptus ruficollis / Mergullón pequeno
Cormorán / Phalacrocorax carbo / Corvo mariño
Garcilla bueyera / Bubulcus ibis / Garza boieira - garza mediana
Garceta / Egretta garzetta / Garzota
Garza real / Ardea cinerea / Garza real
Espátula / Platalea leucorodia / Cullereiro
Milano real / Milvus milvus / Miñato real - millafre real
Águila pescadora / Pandion haliaetus / Aguia pescadora
Grulla / Grus grus / Grou
Chorlitejo Grande / Charadrius hiaticula / Píllara real
Chorlito Gris / Pluvialis squatarola / Píllara cincenta
Correlimos común / Calidris alpina / Pilro común - pilro curlibico
Zarapito trinador / Numenius phaeopus / Mazarico chiador
Zarapito real / Numenius arquata / Mazarico real
Archibebe común / Tringa totanus / Bilurico patirrubio - bilurico común
Archibebe claro / Tringa nebularia / Bilurico pativerde - bilurico claro
Andarríos chico / Actitis hypoleucos / Bilurico das rochas - bilurico bailón
Aguja colinegra / Limosa limosa / Mazarico rabinegro
Gaviota reidora / Chroicocephalus ridibundus / Gaivota chorona
Gaviota sombría / Larus fuscus / Gaivota escura
Gaviota patiamarilla / Larus michahellis / Gaivota patiamarela
Martín pescador / Alcedo atthis / Picapeixe - martiño peixeiro




Saúdos e ata a próxima.

Imaxes e texto baixo licenza Creative Commons
Enrique Sampedro Miranda
Blog Ría de Ribadeo: www.riaderibadeo.com

No hay comentarios:

Publicar un comentario