Qué ver nestas datas pola ría de Ribadeo

Pois o que se movía pola ría (que eu vira) a semana pasada, que foi cando fixen a miña última saída por alí, era o seguinte. Un grupo de 6 cullereiros (Platalea leucorodia / espátula), entre o que estaba o exemplar anelado que leva tempo na ría.

Nos mesmos penedos que estaban os cullereiros, na praia de Salías, habí tamén un par de garzas reais (Ardea cinerea / Garza real) e 3 lampareiros (Haematopus ostralegus / ostrero).

Polas beiras da Lieira movíase un grupo de 13 pilros comúns (Calidris alpina / correlimos común), 2 biluricos bailóns (Actitis hypoleucos / andarríos chico), 1 bilurico pativerde (Tringa nebularia / archibebe claro) e varios mazaricos (Numenius spp. / zarapitos).

Na zona interna da ría, pouca cousa. Un corvo mariño (Phalacrocorax carbo / cormorán grande) oteaba o panorama desde este pousadoiro, aproveitando a ausencia da súa propietaria lexítima, a nosa querida "Panchita". 

Ainda que había outra pescadora (Pandion haliaetus / águila pescadora) na ría eses días, observada por Pablo Miki o 19 de abril, e que ademais estaba anelada. Trátase de este exemplar, unha femia procedente de Escocia, concretamente do lago Lomond, onde fora anelada o 5/07/2012. Gracias Pablo por pasarme os datos e estas boas fotos.

Foto: Pablo "Miki" García

Foto: Pablo "Miki" García

E para finalizar esta entrada, unhas fotos doutra das visitas que fixen á charca de Rinlo nestes días de Semana Santa. Seguía por alí a patuda (Himantopus himantopus / cigüeñuela) observada en días anteriores, varios lavancos (Anas platyrhynchos), tres culleretes (Anas clypeata / pato cuchara), 5 pilros comúns, e un bilurico patirrubio (Tringa totanus / archibebe común).

Imágenes y texto bajo licencia Creative Commons
Enrique Sampedro Miranda

Ría de Ribadeo: www.riaderibadeo.com

Charca de Rinlo: Anas querquedula, Locustella naevia, etc.

De novo por Ribadeo, a miña primeira visita destes días foi a charca de Rinlo. Polas datas nas que estamos, xa metidos na época de paso posnupcial para moitas especies, esperaba atoparme cousas interesantes por este sorprendente humidal, xa toda unha referencia para ornitólogos e "rarólogos" galegos e asturianos. E a cousa non defraudou, xa que nada máis chegar puiden ver que había varios visitantes do máis interesante.

Gaivotas e lavancos

Entre gaivotas patiamarelas (Larus michahellis), lavancos (Anas platyrhynchos) e culleretes (Anas clypeata), destacaba a presenza dunha cerceta do estío ou cerceta albela (Anas querquedula), cerceta carretona en castelán.

 

Tamén chamaba a atención unha patuda (Himantopus himantopus), así coma dous biluricos patirrubios (Tringa totanus) e un pilro común (Calidris alpina).

Patuda

 

Bilurico patirrubio

Pirlo común

Gaivota patiamarela

Despois de repasar o que había na charca, achegueime ata o Penedo do Corvo, onde descansaba este nutrido grupo de corvos mariños cristados (Phalacrocorax aristotelis), entre os que había varios anelados.

 

 

 

Xa cando marchaba para outro lado, avisoume Pablo Miki García de que estaba a observar na zona, "a huevo", un exemplar de folosa manchada (Locustella naevia), buscarla pintoja en castelán. Precisamente fai pouco Xabier Prieto comentárame que nesta zona nosa había citas recentes, así que non sería difícil vela. Pois aquí está Xabi. Gracias a Pablo, temos a confirmación. Ademáis comentoume doutro lugar tamén pola zona na que a observou. Esta estaba en pleno postureo nupcial, así que a súa cría aquí podemos tamén confirmala.

 

Para rematar, unha observación menos glamurosa, pero non menos fermosa, como é esta lavandeira marela (Motacilla flava).

Imágenes y texto bajo licencia Creative Commons
Enrique Sampedro Miranda
Ría de Ribadeo: www.riaderibadeo.com

Paso de aves migratorias pola ría de Ribadeo

O mesmo día que estivemos en Rinlo, decidimos dar tamén unha volta pola ría para ver o que había. E non era pouco, xa que como dicía na anterior entrada, moitas aves están xa en plena migración posnupcial.

Pasamos primeiro polo Muro das Lamas, onde se acumulaban os mazaricos e biluricos, por estar a marea chea.

Estas son as cifras por especie que contamos nesta zona da ría:
- Mazarico real / Zarapito real / Numenius arquata: 55
- Mazarico chiador / Zarapito trinador / Numenius phaeopus: 47
- Bilurico pativerde / Archibebe claro / Tringa nebularia: 52
- Bilurico común / Archibebe común / Tringa totanus: 3
- Píllara real / Chorlitejo grande / Charadrius hiaticula: 8
- Pirlo común / Correlimos común / Calidris alpina: 2
- Garzota / Garceta / Egretta garzetta: 1

Posteriormente fomos á enseada da Lieira, en concreto, á praia de Salías. Alí puidemos observar sobre todo gaivotas: patiamarela (Larus michaellis), gaivotón (Larus marinus), chorona (Chroicocephalus ridibundus)... Pero entre elas, chamáronnos tamén a atención varias cabecinegras (Larus melanocephalus).

Tamén na Lieira puidemos observar a presenza dun mergullón cristado (Podiceps cristatus). Estaba bastante lonxe e as fotos non son nada boas, pero pódese identificar o animal.

Noutra zona da ría tamén puidemos ver ó exemplar de aguia pescadora (Pandion haliaetus) que leva todo o ano aquí. Como xa se contou neste blog en anteriores entradas, ademais da famosa "Panchita", que acaba de criar en Francia e agardamos volva outro ano máis a invernar ó noso estuario, pasaron este ano varios exemplares de pescadora pola ría. E unha delas, quedou con nosoutros a pasar a época estival, o que a fai especial. Pablo García mándame estas fotos sacadas a primeira o pasado inverno, e a segunda fai escasos días.

Foto: Pablo García, "Miki".

Imágenes y texto bajo licencia Creative Commons

Enrique Sampedro Miranda

Ría de Ribadeo: www.riaderibadeo.com

Biluricos bastardos e outras limícolas na charca de Rinlo

Son datas de paso de aves migratorias pola nosa costa, e comezan xa a verse observacións interesantes. O pasado xoves Pablo García avisoume de que vira na charca de Rinlo un exemplar de bilurico bastardo (Tringa glareola), e o venres fomos os dous xuntos a ver si seguía por alí. Para a nosa sorpresa, non só seguía alí, senón que había tres exemplares. Aquí van algunhas fotos.

Ademais dos biluricos bastardos, chamounos tamén a atención a presenza de pilros pequenos (Calidris minuta).

Pilro pequeno

Pilro pequeno xunto a bilurico bastardo

O baixo nivel de auga da charca nestes momentos parece ser da querenza das aves limícolas que pasan por alí, xa que había varias especies. Ademais das citadas anteriormente, había tamén outras coma píllaras reais (Charadrius hiaticula), becacinas (Gallinago gallinago) ou biluricos comúns (Tringa totanus).

Charca de Rinlo

Píllara real

Pilro pequeno, píllara real e bilurico bastardo

Bilurico común e bilurico bastardo

Píllaras reais e pilro pequeno

Tamén decidiu pasar por alí unha garza real (Ardea cinerea), que non por ser máis común, deixa de ser fermosa.

Xa mirando cara ó mar, vimos pasar tamén un bando de mazaricos (Numenius spp.) e outro de pentumeiros (Melanitta nigra).

E para rematar esta breve entrada, unhas fotos deste exemplar de corvo mariño cristado (Phalacrocorax aristotelis), cunha anela verde co código CG branco. Segundo as averiguacións de Gilberto Sánchez, quen se nos uniu posteriormente, provén dun programa de anelamento do Pais Vasco.

Pena Corveira (Rinlo)

Imágenes y texto bajo licencia Creative Commons

Enrique Sampedro Miranda

Ría de Ribadeo: www.riaderibadeo.com