Ría de Ribadeo: Gavia immer

Mostrando entradas con la etiqueta Gavia immer. Mostrar todas las entradas

sábado, 17 de diciembre de 2022

Invernada na ría

De volta por Ribadeo, non podía deixar de sair pola ría para ver como vai a invernada no noso estuario. Deixo a relación das especies que observei na tarde do sábado 10 de decembro, con algunhas cifras.

		*Castellano / Nombre científico* / Galego**
347	-	Ánade silbón / Mareca penelope / Asubiador
15	-	Ánade friso / Mareca strepera / Pato frisado
70	-	Cerceta / Anas crecca / Cerceta
400	-	Ánade real / Anas platyrhynchos / Lavanco
*80	-	Ánade rabudo / Anas acuta / Pato rabilongo
1	-	Negrón / Melanitta nigra / Pentumeiro
3	-	Colimbo grande / Gavia immer / Mobella grande
30	-	Cormorán / Phalacrocorax carbo / Corvo mariño
5	-	Garcilla bueyera / Bubulcus ibis / Garza boieira
14	-	Garceta / Egretta garzetta / Garzota
42	-	Garza real / Ardea cinerea / Garza real
46	-	Espátula / Platalea leucorodia / Cullereiro
2-3?	-	Águila pescadora / Pandion haliaetus / Aguia pescadora
16	-	Correlimos común / Calidris alpina / Pilro común
x	-	Zarapito real / Numenius arquata / Mazarico real
x	-	Archibebe claro / Tringa nebularia / Bilurico pativerde
3	-	Andarríos chico / Actitis hypoleucos / Bilurico das rochas
x	-	Gaviota reidora / Chroicocephalus ridibundus / Gaivota chorona
x	-	Gaviota sombría / Larus fuscus / Gaivota escura
x	-	Gaviota patiamarilla / Larus michahellis / Gaivota patiamarela
2	-	Gavión atlántico / Larus marinus / Gaivotón
1	-	Charrán patinegro / Thalasseus sandvicensis / Carrán cristado
2	-	Martín pescador / Alcedo atthis / Picapeixe

*Só puiden ver unha parte do grupo, e estaban na beira oposta da ría, a moita distancia. Haberá mais.

Foi unha volta rápida pola ría na que estou seguro de que se me escaparon especies que non aparecen no listado, e que son habituais no inverno na ría. Falo por exemplo de mergullóns de pescozo negro, mazaricos chiadores, biluricos comúns, píllaras ou lampareiros. A ver si para a próxima saída hai mais sorte con elas.

Pola contra, especies coma os cullereiros seguen incrementando as súas cifras ano tras ano na ría. Desta volta as 46 que contei sería un novo record de exemplares invernantes. Superaría con creces o record de 31 exemplares do ano pasado.

Entre as pescadoras, cómo non, volve estar a nosa querida Panchita. Trátase da súa invernada número 12 na ría.

Saúdos e ata a próxima.

Imaxes e texto baixo licenza Creative Commons

Enrique Sampedro Miranda

Blog Ría de Ribadeo: www.riaderibadeo.com

miércoles, 4 de mayo de 2016

Mobella grande, pilros, mazaricos e pouco máis na Ría de Ribadeo

O luns día 2 de maio saín dar unha volta a ver qué se movía pola ría. A pesar de adicarlle escasa hora e media, e de non coller a marea nas condicións que máis me gusta, sempre se ven cousas no estuario do Eo.

Comezo contando que na praia de Salías, co mar xa bastante lonxe, puiden observar un bando duns 50 pilros comúns (Calidris alpina) alimentándose na beira. Xunto cun par de mazaricos chiadores (Numenius phaeopus), abundantes gaivotas e algún lavanco (Anas platyrhynchos), pouco máis había por alí.

Pilros

Mazarico chiador

A seguinte parada fíxena no porto da Veiga, onde a sorpresa deuma esta mobella grande (Gavia immer) que buscaba alimento nesta zona interior da ría. É a primeira vez que vexo unha mobella nesta zona, e tamén a primeira vez que a vexo nesta época do ano, ben entrada xa a primavera, o que non é moi habitual. Ainda que tampouco é algo excepcional, está claro.

Por alí andaban tamén algúns lavancos e un par de biluricos bailóns (Actitis hypoleucos).

Bilurico bailón

Lavancos

Pasando xa á beira galega, na ampla zona intermareal do Muro das Lamas, o máis destacado era a presenza dun grupiño de 15 mazaricos chiadores.

E entre o Muro das Lamas e o Puntal, apareceron tamén 2 biluricos pativerdes (Tringa nebularia), 1 garza real (Ardea cinerea), 1 garzota (Egretta garzetta) e varios corvos mariños grandes (Phalacrocorax carbo).

Isto é todo por esta vez. Graciñas por entrar no blog e ata a próxima.

Imaxes e texto baixo licenza Creative Commons
Enrique Sampedro Miranda
Blog Ría de Ribadeo: www.riaderibadeo.com

lunes, 11 de enero de 2016

Fauna portuaria de Ribadeo

Se o 2015 remataba no blog cunha entrada sobre a Ría de Ribadeo, o 2016 comeza do mesmo xeito. Nesta ocasión tráiovos algunhas fotos sacadas un dos primeiros días do ano no peirao de Ribadeo. Nun único paseo partindo do porto deportivo, pasando logo polo pesqueiro, e rematando no peirao comercial, pódese observar unha interesante variedade de especies. Son aves que as temos aí á nosa beira, pero que moitas veces pasan desapercibidas para a maioría da xente.

Comecei o paseo no porto deportivo, e nada máis chegar xa se presentou a primeira especie interesante, unha mobella grande (Gavia immer).

Trátase dun ave moi escasa, pero da que tódolos invernos podemos observar varios exemplares na nosa ría. A poboación europea reprodúcese na tundra e nos bosques boreais, e durante o inverno é cando os podemos ver nas nosas costas, aínda que en números moi reducidos, como dicía. Estímase que na península poden invernar en torno a 300-500 individuos, a maioría deles na costa cantábrica e atlántica.

Sen saír do peirao deportivo, pronto apareceu outra das xoias da nosa fauna, un picapeixe (Alcedo athis). Delatouno o seu chío agudo e prolongado, que me fixo mirar para onde el estaba. A pesar dos seus incesantes vos e mergulladuras entre as embarcacións amarradas nos pantaláns, conseguín tirarlle algunha foto mentres pousaba no motor fora borda dunha delas.

O espigón da mariña seca do Clube Náutico é outro bo lugar para observar aves mariñas. Alí soen pousarse a descansar, xa que ó estar pechado o acceso ás persoas, as aves atopan un lugar seguro no que librarse das molestias humanas. Así, é habitual ver alí corvos mariños (Phalacrocorax carbo) secando as súas ás ó vento, gaivotas patiamarelas (Larus michahellis) e escuras (Larus fuscus), gaivotóns (Larus marinus) ou algún carrán (Sterna spp.).

Corvo mariño grande e gaivotón

De aí pasei á dársena pesqueira, ó pé da lonxa, onde tamén se poden ver moi de preto gaivotas, algunha mobella ou corvos mariños. E tamén nesta ocasión un corvo, pero non mariño, senón un corvo pequeno (Corvus corone).

Corvo pequeno

Gaivota patiamarela

Mentres me sobrevoaba unha garza boieira (Bubulcus ibis) que iría cara a algún prado do interior a alimentarse, achegueime para ver a outros dos habitantes do noso porto, os pilros comúns (Calidris alpina), que aproveitan os penedos do dique para descansar a salvo das mareas.

E o paseo rematou no peirao comercial. Ó carón dos barcos de carga, guindastres e camións levando e traendo pasta de papel, madeira e caolín, é posible observar aves salvaxes tan fermosas coma por exemplo os mergullóns de pescozo negro (Podiceps nigricollis), habituais na enseada situada entre o porto e a praia dos Bloques.

Estas aves invernantes na nosa ría, comparten espazo tamén nesta zona con outras especies que se poden ver por aquí cando a marea está baixa, coma cullereiros (Platalea leucorodia), garzotas (Egretta garzetta), ou con sorte, algún carolón (Alca torda), como xa teño visto noutras ocasións.

Como vedes, non fai falta saír moi lonxe da casa para poder gozar da natureza salvaxe na nosa ría. É máis, nin sequera fai falta desprazarse a zonas da ría que sen dúbida están mellor conservadas ca esta. Nun entorno tan humanizado e alterado como a zona portuaria de Ribadeo, é posible facelo.

Imaxes e texto baixo licenza Creative Commons

Enrique Sampedro Miranda

Blog Ría de Ribadeo: www.riaderibadeo.com

viernes, 1 de enero de 2016

Despedindo o ano na Ría de Ribadeo

Outra vez máis despedín o ano paxareando na Ría de Ribadeo, o meu lugar favorito, e polo que naceu este blog. A pesar do forte vento do sur destas últimas datas, e dos días de choivas e tempo revolto, conseguín facer unha saída un día no que a climatoloxía deu unha lixeira tregua. Non observei nada extraordinario, pero a riqueza da ría non está nas citas extraordinarias, senon na biodiversidade que posúe. Son as especies invernantes as que lle dan ó noso estuario o seu valor. E estas nunca fallan.

Coas primeiras luces do día achegueime en primeiro lugar á beira asturiana. En Salías, e coa preamar, alí estaban as limícolas agardándome. Mazaricos reais, mazaricos rabinegros, biluricos pativerdes, e pilros comúns ocupaban os penedos.

Tamén estiven un bo rato entretido observando cómo unha garzota e dous corvos mariños pescaban en común. Mentres os corvos mariños acurralaban ós peixes contra a beira, a garzota facía o mesmo desde a beira cara a eles. E os tres beneficiábanse destas maniobras pescando ás presas que caían na trampa.

Do outro lado do Torullón estaban os cullereiros, garzotas, garzas reais e corvos mariños, así coma un numeroso grupo de anátidas, formado principalmente por lavancos e asubións, e algún que outro pato rabilongo polo medio.

Xa desde a Punta de Castropol puiden ver unha mobella grande, varios mergullóns de pescozo negro, e un carrán cristado, ademáis de outras especies xa citadas anteriormente.

Garzota

Mergullón de pescozo negro

Pasando logo á beira galega, desde Reme puiden ver o groso das anátidas invernantes. Non as contei, pero coma sempre, centos de rabudos, lavancos, cercetas, asubións, e tamén varias decenas de frisados. Tamén desde aquí puiden observar catro biluricos comúns, especie que se vai confirmando como invernante nos últimos anos, ainda que en números moi baixos.

Vista da Xunqueira, na parte galega da ría

Desde o observatorio de Reme localicei tamén as dúas águias pescadoras invernantes, Panchita e Virgilia. Aquí vos deixo unha foto testemuñal da segunda, con anela de PVC de cor amarelo na pata esquerda. Panchita estaba nun pousadoiro máis lonxano e as fotos non merecen a pena.

A última parada desta volta ó estuario do Eo foi na praia dos Bloques. Alí outra mobella grande e tres mergullóns de pescozo negro déronme a despedida.